《其實Minions都幾似香港人啊》
Minions大電影終於都係香港上畫喇，打風個日香港人就幫套戲衝上千萬票房，真心勁！佢地深受男女老少歡迎，除左因為得意之外，我覺得Minions啲性格或多或少都有啲似曾相識。呢班可愛的黄色軍團到底邊度似香港人呢？
首先從外表上去講，黃皮膚加工人褲，典型「打工仔」形象，同香港人一直比人的印象都好夾。而且睇左套戲就知，班Minions 一路都係為「主人」服務，令到「主人」開心，佢地就開心，而當佢地無左一個「主人」時，佢地就會無左方向，唔知可以點。某程度上，好多香港人依然都係咁樣，慣左被人HEAD 住，無左個大佬就有啲失措。香港本身啊，都係一路被人統治住，要真係自立運行時，好多香港人都未必適應到。
另外就係Minions 的生存同適應能力好頑強，經歷唔同BOSS的管治，就算啲BOSS全部死晒，佢地依然生存到落黎，而且仲好有衝勁揾下一個BOSS。佢地心目中無一個永遠的BOSS，呢個唔得咪跟下一個揾食囉，佢地自有方法生存落去，忠心程度都係依據BOSS 的能力而定的。佢地當你係BOSS時當然對你好啦，但如果佢地覺得你唔掂喇，咁就拍拍籮柚走架喇，唔理得咁多。正如香港人心目中都無一個永遠的BOSS，比到飯我食，比到錢我揾，咪當你係BOSS 囉，就係咁簡單。Minions 的世界裏面，Banana 就係最大的利益，當然現實社會的利益複雜好多啦。
最後一點就係佢地之間有時都以互相嘲弄為樂，鍾意食花生睇人PK呢種性格同香港人都幾似架。佢地又唔會掩飾咁多，係覺得你好笑就會笑到你傻為止，呢種直爽性格雖然唔係個個都接受到。咁當然睇番Minions互相都好團結啦，有福同享有難同當，呢點同政府成日宣傳的「獅子山精神－同舟共濟」是不謀而合的。
而Sidetrack 一點，今次套戲主要取景地係英國，相信亦會勾起唔少港人戀英情意結的感覺，所以套戲係香港大受歡迎，可能都有少少關事架。反正似又好唔似又好，港人睇Minions 套野用黎減下壓都唔錯既。
Search